Wanderstop, Dune: Awakening, Koira edo Mecha Break bezalako joko interesgarriak proba ditzakegu PCan.

Steam plataformak Next Fest ekimen berriari ekin dio. Martxoaren 3ra arte ehundaka demo desberdin probatzeko aukera daukate ordenagailuko bidejokozaleek.

Atzo arratsaldean hasi zuten doako proben jaialdia, denetariko bideojokoak eskainita: biziraupena, kudeaketa, akzioa, estrategia eta gehiago aurkituko dugu. Ohi bezala, Valve-ko arduradunek gutxi batzuk aditzera eman gura izan dituzte aurkezpen bideoarekin: Wanderstop, Tempest Rising, Kiborg, Goodlands, Dune: Awakening, Koira edo Mecha Break dira nabarmendutakoak, besteak beste.

Bestelako obra interesgarriak ere aurki daitezke, gainera: Gothic 1 desiratuaren berregitearena, Konami-k argitaratuko duen Deliver At All Costs zirraragarriarena zein The Hundred Line -Last Defense Academy interesgarriarena, adibidez.

Horrenbeste bideojokoren artean galtzea erraza denez, bilatzaile eraginkorra eskaini digute, aurrekote Steam Next Festetan egin bezala. Demorik jokatuenak bilatu ahalko ditugu, edo, zuzenean, gure genero gogokoenetako lanak bereizi.

Azken urteetan Steametik egindako ekitaldirik arrakastatsuenetakoa izatera igaro da Next Festa; ez da harritzekoa, argitaratzear dauden altxorrak ezagutzeko txoko aproposa baita. Sarean, gainera, gomendioak eta aurkikuntzak partekatzeko ohitura dago, ustekabeko joko berezi horiek zabaltzeko asmoarekin.

Hortaz, ireki Steam, sartu jaialdiak dendan daukan atal berezira, eta has zaitez demoak probatzen. Martxoaren 3an 19:00etan bukatuko dute ekimena; hala eta guztiz ere, proba ugari eskaintzen jarrai dezakete garatzaileek, horrela nahi izanez gero.