Unknown Worlds taldeak biziraupen eta esplorazio titulu arrakastatsua ukipen pantailetarako egokituko du Playdigious estudioarekin elkarlanean.

Mugikorrek Subnautica berezia ikusiko dute uztailaren 8an. Unknown Worldsek aditzera eman duenez, sakontasunetako abentura Android eta iOS sistema eragileetara eramango du.

Playdigious taldearekin bat egin dute sakelekoetarako port-a prestatzerako orduan. Argi dagoenez, interfazea zein kontrola eraberritzea eta moldatzea da erronkarik handiena; horrela, ukipen pantailetarako egokituko dute Subnautica.

Aldi berean, aginteentzako euskarria agindu dute arduradunek MFi mandoak aipatzen dira prentsa oharrean, hau da, Apple-n sistemetan funtzionatzen dutenak, baina Androiderako ohiko aginteekin aritu ahalko garela espero dugu.

Gainera, Game Center lorpenak, jarraipen gurutzatua ahalbidetzen dituzten hodeiko gordetako partidak eta gehiago prestatuko dituzte bertsio berrietarako.

Subnautica originala 2018. urtean estreinatu zen, lau urtez aurretiazko sarbidean egon ondoren. PCra iritsi zen lehenik eta behin, baina, ia jarraian, PlayStation 4 eta Xbox One bertsioak ikusi genituen, azkenik Switch-etik zein egungo PS5 eta Xbox Series kontsoletatik ere igarotzeko. 2021ean, berriz, Subnautica: Below Zero eduki gehigarria argitaratu zen.

Balorazio bikainak lortu zituen Unknown Worldsen esplorazio eta biziraupen tituluak. Urez betetako planeta misteriotsua igerian zeharkatu beharko dugu, ihes egiteko baliabide bila. Arriskuak, sekretuak eta gehiago aurkituko ditugu bidean.

Egileak Subnautica 2 garatzen dabiltza une honetan. Dakigunagatik aurten aurretiazko sarbidean estreinatzeko asmoa daukate; halere, azken hilabeteotan ez dugu berririk jaso. Lau jokalarirentzako multijokalaria proposatuko digute oraingoan, izaki, munstro, erreminta eta ibilgailu berriak bilduta. PC eta Xbox Series bertsioak dira iragarritakoak.

Subnautica originalaren Android eta iOS bertsioa uztailaren 8an kaleratuko dira.