Metroid Prime 4: Beyond, Pokémon Legends: Z-A, Super Mario Party Jamboree, The Legend of Zelda: Breath of the Wild edo Kirby and the Forgotten Land aipatu dituzte.

Switch 2ak Nintendoren aurreko belaunaldiko bideojokoak hobetzeko balioko du. N handiak adierazi duenez, Switch kontsolako zenbait tituluk ordainpeko gaurkotzeak jasoko dituzte gailu berrian.

Oraindik estreinatzeko dauden Metroid Prime 4: Beyond eta Pokémon Legends: Z-A zein aspalditik gure artean ditugun Super Mario Party Jamboree, The Legend of Zelda: Breath of the Wild zein Tears of the Kingdom eta Kirby and the Forgotten Land dira, oraingoz, eguneraketa handiak iragarri dituztenak.

Metroid Prime 4ren eta Pokémon Legendsen kasuan, hobekuntza gehienak grafikoak dira. Adibidez, MP4k bi modalitate grafiko edukiko ditu Switch 2an: 4K eta 60 fps aukerekin joka dezakegu, edo 1080p bereizmenean nahiz 120 fps-ko tasan. HDR funtzioak datoz guztietan, eta Switch 2aren sagu funtzionalitatea erabil dezakegu, gainera.

Antzekoa gertatzen da Zelda BotW eta TotK abenturekin: bereizmena eta segundoko irudien tasa areagotuko dituzte, eta, gainera, HDR funtzioak gehituko dizkiete. Zelda Notes ere iragarri dute: mugikorrean jokoko menuak eta laguntzak erabiltzeko aplikazioa —TotK-eko sorkuntzen planoak lagunekin partekatzea ahalbidetuz!—. Dirudienez, Nintendo Switch Online + Expansion Pack zerbitzuaren harpidedunek doan jasoko dituzte Zelda tituluen hobekuntzak: ekainaren 5ean kontsolarekin batera iritsiko dira.

Interesgarriagoak dira aipatu ditugun beste jokoentzako eguneratzeak. Jamboreeren kasuan, minijoko guztiz berriak prestatuko dituzte Switch 2aren ezaugarri bereziak aprobetxatzeko. Super Mario Party Jamboree – Nintendo Switch 2 Edition + Jamboree TV izenpean, sagu zein ahots kontrolekin jokatzeko minijokoak, kamerarekin gure burua partidetan agertzeko aukerak eta Bowser Show zein Carnival Coaster modalitateak ikusiko ditugu uztailaren 24an.

Kirbyk, bukatzeko, Kirby and the Forgotten Land – Nintendo Switch 2 Edition + Star-Crossed World gaurkotzea ikusiko du bere azken jokoarentzat. Espantsio guztiz berria izango dela dirudi, meteorito batek ahaztutako lurrak jo ondoren biziko duguna. Maila berriekin batera bereizmena eta irudien tasa hobetuko dituzte, noski, abuztuaren 28an.

Nintendo Switch 2 edizio edo gaurkotze hauek ordainpekoak dira, esan bezala: joko osoak fisikoki zein digitalki erosi ahalko direla adierazi dute japoniarrek. Joko originalak dituztenek, ordea, eguneratzeak eros ditzakete eShop saltokiaren bidez. Prezioak baieztatu gabe daude.

 

Doako eguneraketak ere ikusiko ditugu

Direct aurkezpenetik kanpo geratu badira ere, Switch originaleko beste zenbait bideojokok doako gaurkotzeak ikusiko dituzte Switch 2rako. Xehetasun askorik eman gabe, eguneratzeekin denetariko hobekuntzak ikusiko ditugula diote Nintendokoek. Joko hauek dira adabakiak jasoko dituztenak:

  • Arms
  • Captain Toad: Treasure Tracker
  • Super Mario Odyssey
  • Super Mario 3D World + Bowser’s Fury
  • Clubhouse Games: 51 Worldwide Classics
  • The Legend of Zelda: Link’s Awakening
  • The Legend of Zelda: Echoes of Wisdom
  • Game Builder Garage
  • New Super Mario Bros. U Deluxe
  • Pokémon Scarlet
  • Pokémon Violet
  • Big Brain Academy: Brain vs. Brain

 

Retrobateragarritasuna

Switch originaleko bideojoko gehienak arazorik gabe joka daitezke Switch 2an. Hala eta guztiz ere, titulu zehatz batzuek ez dute funtzionatuko, edo akatsak azal ditzakete.

Joy-con zaharrentzako prestatutako jokoak aipatzen dituzte Nintendokoek, hasteko: Ring Fit Adventure, Nintendo Labo, 1-2-Switch, Game Builder Garage, Dr Kawashima's Brain Training for Nintendo Switch, WarioWare: Move It!, Everybody 1-2-Switch! eta beste hainbat tituluk arazoak izango dituzte ez baditugu aurreko kontsolaren mandoekin erabiltzen.

Beste kasu batzuetan aldiz, bateragarritasun arazo nabarmenagoak daude. Bi zerrenda eratu dituzte Nintendokoek: zuzenean ez dutenak funtzionatzen, eta, funtzionatu bai, baina bateragarritasun arazoak dituztenak zerrendatu dituzte.

Azaldu dutenez, arazoak erakusten dituzten bideojokoen bateragarritasuna hobetzeko lanetan dabiltza. Hirugarrenen jokoen kasuan, beste enpresekin elkarlana abiatu dute.

Nintendo Switch 2 kontsola ekainaren 5ean merkaturatuko da.