Sarah Connor, John Connor zein T-800 mitikoekin jokatuko dugu. Irailaren 5ean estreinatuko da kontsola guztietan zein PCan.

Terminatorren bideojokoen birsortzea ikusten gabiltza urteotan. Reef Entertainment argitaletxeak Terminator 2D: No Fate aurkeztu du. Contra bezalako run and gun klasikoen estiloko titulua izango da.

Bitmap Bureau estudioa garatzen ari den jokoan Sarah Connorren zein T-800 makinan bilakatuko gara. T2 filmeko jazoerarik garrantzitsuenak berriz biziko ditugula dirudi, baita John Connor erresistentziaren burua etorkizunean kontrolatu ere.

Dozenaka arma hartuta lasterka, jauzika eta tiroka ariko gara dozenaka arerioren kontra. Sarah Connorren zoroetxeko ihesaldia, ubidean motorra hartuta kamioiaren aurkako “duelua”, Cyberdyne-n egoitzako tiroketa… une gogoangarri ugari berregin dituztela ageri da bideoan.

Pixel art landuarekin eta koloretsuarekin biziko dugu T 2D: No Fate. Arkade aretoetako bi dimentsioko obrarik maitatuenak hartu dituzte inspirazio iturritzat.

Aurten jokatuko dugu Terminatorren obra berrian: irailaren 5erako kaleratzeko asmoa daukate egileek. PlayStation 5, PlayStation 4, Nintendo Switch, Xbox Series eta Xbox One kontsoletan argitaratuko dute PCko bertsioarekin batera.