Urtebete baino gehiago eman du sarbide goiztiarrean PCan. Urtea bukatu aurretik Nintendo Switch gailuetan ere argitaratuko du Ubisoft-ek.

The Rogue Prince of Persiaren behin betiko bertsioa argitaratu dute Evil Empire eta Ubisoft taldeek. PCrako 1.0 bertsioaz gain, PlayStation eta Xbox port-ak ere estreinatu dituzte.

2024ko maiatz bukaeran hasi zuen ibilbidea Evil Empiren bideojokoak sarbide goiztiarrarekin. Ordenagailuetako bertsioa hedatzen eta hobetzen eman dute azken urtea, askotariko edukiak inplementatuta zein akatsak zuzenduta. Ordutik hona balorazio positiboak eskuratu ditu jokalarien aldetik.

Erroetara itzultzen bada ere, izenak dioen bezala, roguelike mekanikak nagusi dituen 2D abentura da persiar printzearen azkena. Dead Cells-en sortzaileetako batzuk osatzen dute Evil Empire: hori horrela, aurreko jokoaren antzeko ideiak eta jokagarritasuna errepikatu dute, oraingoan Ubisoften pertsonaia famatuaren unibertsoa hartuta.

Tresna eta abilezia gutxirekin hasiko ditugu partidak. Akrobazientzako iaioa izango da behintzat, beti bezala, printzea. Aurrera egin ahala partida bukatzerakoan desagertuko diren armak, magiak eta bestelakoak eskuratuko ditugu, ausazkoak izango diren arren.

Borroketan ingurunea erabiltzearen garrantzia azpimarratzen dute egileek: ostikoekin geziak zein arrokak desbideratuko ditugu, adibidez, baina etsaiak tranpetara jaurtitzeko aukera ere badaukagu.

1.0 bertsioak bi bioma berri dakartza, Ctesiphon portua nahiz jauregia, baita istorioaren amaiera ere, azken buruzagi handia barne.

“Bideojokoa arrakastatsua bada” are eduki gehiago prestatzeko aukera aipatzen dute Evil Empirekoek, baina, berez, jokoa bukatutzat jo dute, eta esku artean proiektu gehiago dituztela nabarmendu. Azken kontsoletarako portak prestatzen dihardute orain: Switch 2an zein Switch originalean ere ikusiko dugu printzearen roguelike titulua urtea bukatu aurretik.

The Rogue Prince of Persiak PC, PlayStation eta Xbox gailuetan kaleratu du 1.0 bertsioa.