Eclipse Glow Games estudio berriaren jokoa Arturo erregearen kondairetan oinarritutako hack and slash abentura da.

Tides of Annihilationen iragarpena State of Play zuzenekoaren ustekabeko handietako bat izan da. Fantasiazko Londres zein bestelako munduak bisitatuko ditugu akziozko abentura ikusgarrian.

Eclipse Glow Games talde berriaren lehen jokoa da; ez daukagu eurei buruzko informazio askorik, baina iaz Tencent konglomeratuak eratutako estudioa dela dirudi.

Gwendolyn da gure protagonista. Londresek jasandako inbasioaren ostean bizirik jarraitzen duen pertsona bakarra da, baina, Arturo erregearen zaldunen espirituen laguntzarekin mendekuaren bila joko du Avalon erresuma magikora.

Hack and slash kutsuak hartuko ditu tituluak, baina Shadow of the Colossus zantzuak ere ikus daitezke, batez ere izaki erraldoiak eskalatzerakoan. Deituko ditugun zaldunekin batera ariko gara borroketan, konboak eta aireratzeak erabilita. Garatzaileek 30 buruzagi baino gehiago prestatuko dituztela diote, eta, egia esan, izugarrizko itxura daukate.

Atal grafikoa da, hain zuzen ere, nabarmentzeko alorra: xehetasunez betetako modeloak zein kokalekuak eratu dituzte Tides of Annihilationerako.

PlayStation 5, Xbox Series eta PC plataformetan estreinatuko da Tides of Annihilation. Ez dauka argitaratze datarik, baina arduradunek “laster” kaleratzeko asmoa adierazi dute.