Unity Behavior-en lantalde osoa kanporatu omen du enpresak, besteak beste. Iaz 1.800 langile kaleratu zituen.

Unity garapen motorearen enpresak kaleratzeak iragarri ditu. Langileei bidalitako barne mezuaren bidez “produktua zein ingeniaritza taldeak produktu gehiegiren artean hedatzen da une honetan”, adierazi du Matthew Bromberg presidenteak.

Oraindik ez dakigu zenbat langile kanporatuko dituzten. Hala ere, Unity Behavior taldeko Shanee Nishry arduradunak Unityren foro ofizialetan azaldu du talde osoa kanporatzeen azken txandan desagertu dela.

Andre de Miranda Cardoso Unityren jokagarritasun diseinuaren arduradunak ere antzekoa aipatu du LinkedIn bidez. Talde eta lankide gehiago kaleratuko dituztela aurreikusten da.

Pasa den urtean enpresa “berregituratzeko” helburuari ekin zioten Unitykoek, lantaldearen % 25 kaleratuz: 1.800 langile inguru, hain zuzen ere.

Instalazio kuotak ezarri osteko hondamenari aurre egiteko hartutako erabakia izan zen: Runtime Fee izeneko zergarekin Unityren ordainpeko motore bidez sortutako joko ororen instalazioa kobratzen zuen enpresak.

Garatzaileen zein jokalarien aldetik ehundaka kritika jasan ondoren, sortzaileetako askok beste garapen motore batzuetara igarotzea erabaki zuten: kode askeko Godot izan zen onuradun handienetakoa, baina Unreal Engine ezagunak ere hazkundea nabaritu zuen.

Instalazio kuota baliogabetzeko erabakia hartu zuten Unitytik joan den irailean; hala eta guztiz ere, kuota ezartzearen ondorioak atzetik dituztela agerikoa da.

Datozen orduetan eta egunetan kaleratutako langileei buruzko informazio gehiago edukitzea aurreikusten da.