Bideojoko asiarrak nabarmentzeko asmoa dute Microsoft-ekoek. TGS azoka irailaren 26tik 29ra bitartean egingo da.

Xbox Tokioko bideojokoen azoka nagusian egongo da, baina stand hutsa baino gehiago eskainiko du. Xbox Tokyo Game Show 2024 aurkezpena ezagutzera eman dute: irailaren 26an jarraitzeko aukera edukiko dugu.

12:00etan hasiko dute emanaldia TGSaren YouTube kate ofizialean. Xbox Game Studios, Activision, Blizzard Entertainment eta Bethesda taldeen berritasunak agindu dituzte; hala eta guztiz ere, bideojoko asiarren erakustaldia egongo da.

“Japoniako eta Asiako hirugarrenen bideojoko enpresen titulu sorta zirraragarria eskainiko dugu”, diote prentsa oharrean. Ohi bezala, aurkeztuko dituzten hainbat obra Xbox Game Pass harpidetzan estreinatuko direla azaldu dute Redmond-ekoek.

Zeintzuk dira, beraz, bilduko dituzten iragarpenak? Atlus talde japoniarraren Metaphor: ReFantazio desiratua agertuko da ziur, urrian estreinatuko den JRPGak ez baitu hutsik egin Xboxekoen emanaldietan. Black Myth: Wukong arrakastatsuaren Xboxeko bertsioa polemika artean dabilenez, une aproposa da ganoraz ezagutzera emateko.

Horiez gain, ohiko talde handien iragarpenak espero dira: Capcom, Sega, Square Enix edo Konami bertatik igaroko dira, ziur, Monster Hunter Wilds, Metal Gear Solid Δ: Snake Eater zein Silent Hill 2 bezalako lanekin.

 

PlayStation ere, Tokion

Irailaren 26an irekiko ditu bere ateak Tokioko Game Show azoka erraldoiak. Irailaren 29ra arte 731 erakusketari batuko ditu ekimenak, guztira 3.190 erakusmahai eskainita. Square Enix, Konami, Sega, Bandai Namco, Capcom edo SNK enpresek parte hartuko dute —Nintendo ez da bertan izango—, baina ezustekorik handiena PlayStationen aldetik dator, Sony-ren taldea ere bertan izango baita.

Zergatik ustekabea? PlayStationek berezko gunea erreserbatu du Chiba hiriko Makuhari Messe aretoan, lehen aldiz, 2019tik: azken urteotan ez da azokara hurreratu.

Iragarpen nabarmenak egitea espero da; izan ere, orain egun batzuk PlayStation 5 Pro berriaren irudia erakutsi dute, erdi ezkutatuta, markaren 30. urteurreneko irudian. Hori horrela, iragarpen ofiziala Tokion egiteko aukera dago, edo, lehenago eginez gero, lehen aldiz fisikoki erakutsiko dute agian. Ez hori bakarrik: Xboxekoen bezalako aurkezpena egingo dutela diote zurrumurruek.