Rebel Wolves estudio poloniarraren estreinaldiko obra izango da: The Witcher 3ko beteranoak aurkitzen dira bertan, Konrad Tomaszkiewicz zuzendaria barne.

The Blood of Dawnwalker interesgarriari buruzko berriak jaso ditugu Rebel Wolves taldearen eskutik. RPG abenturak lehen zinematika argitaratu du, modu ikusgarrian bere girotzea aurkeztuz, eta, aldi berean, jokagarritasunaren bideo motza eskaini digu.

Orain urtebete ezagutu genuen, Dawnwalker izenarekin, CD Projekt RED handiko beteranoek osatutako estudio berriaren lehen titulua. “Fantasia iluneko AAA abentura” garatu nahi zutela adierazi ziguten iaz, lehen irudi kontzeptuala erakusteaz gain.

XIV. mendeko Europan girotutako banpiroen eta munstroen jokoa dela ikus dezakegu, azkenik; egia esan, The Witcher sagarekin antzekotasun handiak dauzkala aitortu beharra dago. Coen izeneko gaztea aurkezten zaigu zinematikan: izurri beltzak jotako arreba gaztea salbatu nahian, erregearengandik ihesean dabil. Banpiro talde batek ez dio, baina, ihesaldia erraztuko… edo agian bai.

Dawnwalkerrean bilakatuko gara akziozko RPGan: garatzaileek azaltzen dutenez, gizakiaren eta banpiroaren artean kokatzen den izakia. Naturaz gaindiko botereak erabiliko ditugu borroka odoltsuetan, baina giza sena ere garrantzitsua izango dela azpimarratzen da deskribapenean. Dirudienez, erlojua gure aurka izango dugu arreba salbatzerakoan, baita beste gizakiak zein munstroak ere.

Jokagarritasunari dagokionez, erakutsitako lehen klip motzak ikaragarriak dira. Atal grafikoa goraipatzekoa izango dela dirudi, kalitate goreneko pertsonaien modeloekin nahiz kokalekuekin. Coen teilatuetatik jauzika ageri da bertan; ezpata eskuan hartuta dueluetan parte hartuko dugula ere ikus daiteke.

Ez dugu, zoritxarrez, mekanikak ezagutzeko aukerarik eduki. Udara arte itxaron beharko dugu: egileek aurreratu digutenez, udan jokagarritasuna ganoraz aditzera emateko aurkezpena egiteko asmoa daukate. Dakigunagatik, hori bai, saga berriaren aurrean gaude, erakutsitakoa "lehen atala" izatea nahi baitute.

Estudio poloniarra da Rebel Wolves; esan bezala, garatzaileen artean CD Projekt REDeko beteranoak daude. Izenik ezagunena Konrad Tomaszkiewiczena da: The Witcher 3ren zuzendaria izandakoa, hain zuzen ere.

PlayStation 5, Xbox Series eta PC plataformetan jokatu ahalko dugu Blood of Dawnwalkerren. Argitaratze data ezagutzeko, baina, itxaron egin beharko dugu.