Lasterketa joko erraldoia prestatzen dabiltza Nintendo-koak: 24 gidari eta mekanika mordoa agintzen ditu.

Mario Kart World deitzen da iturginaren lasterketa joko berria. Switch 2arekin batera jasoko dugu ekainaren 5ean, eta mundu irekia izango da bere ardatza.

Kokaleku sorta zabala proposatuko digute, baina, oraingoan, guztia konektatuta egongo dela dirudi. Basamortuak, hiriak, elurtutako gailurrak eta askoz gehiago bisitatuko ditugu, inolako mugarik gabe… lasterketatik kanpo, noski.

Mario, Luigi, DK, Toad, Peach, Bowser eta gainerako ohiko pertsonaia guztiak bueltan dira. Itxura batean, oraingoan iturginaren abenturetako etsai gehiago ikusiko ditugu autoen gainean… eta ez hori bakarrik, motorrak, hegazkinak zein ontziak ere maneiatuko ditugula dirudi.

24 gidariko lasterketak izango zirela uste genuen iragarpen bideoa ikusi ondoren, eta, halaxe da. Inoizko zoramenik handiena proposatuko digu Mario Kart Worldek. Orain arte ikusi gabeko gidatze mekanikak datoz, gainera: horma arteko jauziak, irristatzeak… edo kamioiak kontrolatzeko bideak emango dizkigute.

Grand Prix modalitate klasikoan lasterketetan parte hartzen ariko gara; are gehiago, Knockout Tour berrian lehen postuetan mantendu beharko gara jokatzen jarraitu ahal izateko; bukatzeko, mundua libreki esploratzea proposatuko digu Free Roam joko motak.

Bakarka nahiz lagunekin ariko gara, noski: Worldek multijokalari aukera zabalak eskaintzen ditu. GameChat aukera berriekin ahots zein irudi bidezko txatak erabili ahalko dira.

Mario Kart Worlden informazio guztia eskaintzeko Direct emanaldia iragarri dute, bukatzeko: apirilaren 17an 15:00etatik aurrera jarraitu ahalko dugu.

Laburbilduz, orain arteko Mario Kart handiena izango da World. Ekainaren 5ean estreinatuko da esklusiboki Switch 2 kontsolan. 90 euro balioko ditu bertsio fisikoak; 80 euro, digitalak.