Switch 2ko esklusiboetako bat da. Askatasuna agintzen du, ziztu bizian mugitzeko aukerekin.
Donkey Kong Bananza aurkeztu du Nintendok. Uztailaren 17an argitaratuko dute gorilaren titulu berria, 3D mekaniketara itzulita.
DKren diseinu eraberrituarekin gune zabalak esploratzeari ekingo diogu. Gorilaren mugimenduetan ardaztu dira bideoan, ekintza ugari egiteko gai izango baita: eskalatu, zulatu eta borrokatu egingo du gure protagonistak, jauzika aritzeaz gain, zelan ez.
Meatzeak, mineralak eta arrokak protagonista izango direla antzeman daiteke trailerrean; izan ere, DK lurrazpian sartuko da kolpeka, eta bertan altxorrak biltzeko gai izango da. 2.5D mailak ere zeharkatuko ditugu: Donkey Kong Country originalaren lehen mailari keinu egiten diote, adibidez.
Borrokek ere pisu nabarmena daukate: gorilaren kolpeak hilgarriak izango dira, eta arrokak jaurtitzeko gaitasuna edukiko du. Buruzagiei dagokienez, beste tximuki batzuen aurka egingo dugu oraingoan.
Ez dugu askorik itxaron beharko, esan bezala, Donkey Kong Bananzan aritzeko: uztailaren 17an dator, Switch 2rako.
Iruzkinak (1)
Ibai Aizpurua 2025ko api. 3a, 00:11
Zelako ilusioa daukadan honetan jolasteko!!!!