Ibai Aizpuruak esplorazioa, plataformak eta borrokak elkartu ditu gure inguruenekin eta kondairekin.

Zomorro Studio irundarrak Guillotine metroidvania abenturaren eguneratutako proba kaleratu du. Euskal mitologiako girotzea hartzen duen tituluak burua galdu duen borreroaren rola jokatzen jarriko ditu jokalariak.

Demoa Zomorroren itch.io orrialdean joka dezakegu. Bururik gabe hasiko bagara ere, laster batean akabatzen ditugun etsaien eta izakien buruak jantzi ditzakegula ikusiko dugu. Burmuin bakoitzak bere sekretua gordetzen du: hauei esker, Kirby edo Wario Land jokoetan egin modura, botere desberdinak eskuratuko ditugu.

Oilo buruak jauzi bikoitzaren ahalmena eskainiko digu, esaterako; kuia jantzita, ordea, beleak jaurtiko ditugu. Esplorazioa errazteaz gain, erronka eta puzzle desberdinak gainditzeko beharrezkoak izango dira. Buru bakarra eraman dezakegu gainean, baina: hor hasten dira metroidvania edo Wario Land jokoetako komeriak, gora eta behera ibili beharko baikara botere desberdinak eskuratzen buru hausgarrietan aurrera egiteko.

2015ean egindako Ludum Dare 33 Game Jam ekimenean hasi zen Aizpurua Guillotinen lanean Iñaki Vazquezekin batera. Soinu banda, bestalde, Gonzalo Sardonek sortutakoa da, nahiz eta soinu efektuez Aizpurua arduratzen den. Ostean, Aizpuruak bakarka jarraitu zuen lanean, bertsio berriak prestatuz.

Aspaldi argitaratutako prototipoaren gaurkotutako bertsioak gune zein erronka berriak aurkezten dituen arren, are gehiago gordetzen du bere baitan, hutsetik abiatutako proiektu berria baita. Construct 3 garapen motorearekin prestatzen ari da Ibai Aizpurua: azken demoa Construct 2n eraikia zegoen, eta gaurkotutako jokoak animazio, sprite eta kode berriak biltzen ditu.

Tituluak trailer zein portada berriak jaso ditu, gainera. Bideoan demoan agertu gabe geratu diren guneak, etsaiak eta buruak ikus ditzakegu; azala, bestalde, Joseba Larratxe artistak sortutakoa da.

Game.eus azeleratzailean bideojokoa aurkeztu ondoren, campusekoekin batera Gamescom azoka europarretik igaro zen joan zen astean Guillotine nazioartean aditzera emateko.

Guillotinek argitaratze datarik gabe eta baieztatutako plataformarik gabe jarraitzen du, baina garapenari indar betean heldu dio Aizpuruak. Bitartean, doako proba itch.io saltokian eskura daiteke.