2016an argitaratutako bideo-jokorik onenen artean dauden bi indie jokoetara orain euskaraz ere jolas daiteke.

Hyper Light Drifter

Oroitzapen galduak bata bestearen ostean. Lau lurraldeen artean huts egindako saiakera bat, botere bila. Leherketa izugarria eta suntsiketa. Heriotza. Eta zu, azti ibiltaria, odol putzu handi horren erdian, gorpu artean. Atzetik itzal beltz bat daukazula. Gero, titan erraldoien aurkako borroka, eta forma sakratu hura: diamante arrosa.

Eta argibide gisa ezer gutxi gehiago daukazula, lau lurraldeen munduan zehar abentura bat hasiko duzu piztia izugarrien aurka, zure alde duzun bakarra argi-sable bat eta gelditzen zaizun indar apurra delarik. Kutsaturik zaude gaitz hilgarri batekin, eta sendabide bila abiatu zara. Lortuko al duzu itzal beltza garaitzea? Aurkituko al duzu sendabiderik?

 

Euskaratzeko pausoak

Hyper Light Drifter euskaraz jartzeko pausoak eta informazio gehiago jasotzeko, bisitatu honako helbide hau.

 

Inside

Baso erdian azaldu zara. Zu, mutiko bat, norbaitengandik ihesi. Maskara zuridun gizon batzuk zu ehizatu nahian dabiltza, zakur batzuen laguntzaz. Eta askoz gehiago jakin gabe, gertatzen dena ondo ulertzen ez duzula oraindik, korrika zoaz, oztopo guztiak ekidin eta atzetik dituzunak gainetik kentzeko.

Limbo joko ederraren garatzaileek sortutako bigarren bideojoko honetan kolore pixka bat sartu duten arren, berriro ere mundu gris bat daukagu aurrean, eta aurreko jokoaren mekanika antzekoa, baina istorio guztiz berrian.

 

Euskaratzeko pausoak

Inside euskaraz jartzeko pausoak eta informazio gehiago jasotzeko, bisitatu honako helbide hau.