Contra edo Wild Guns bezalakoak aipatzen dituzte Zenovia Interactive-koek inspirazio iturritzat. “Laster” estreinatuko da PCan nahiz kontsoletan.

Zenovia Interactive indie estudioak Neon Inferno aurkeztu du. Korri eta tiro egin (run and gun) generoaren muinak hartzen dituen retro estiloko titulua izango da.

2055. urteko New York hirian kokatuko da istorioa: Angelo eta Mariana protagonistak kontrolatuz, dozenaka robot eta arerio akabatu beharko ditugu tiroka eta jauzika gabiltzan bitartean. Inspirazio iturria Konami-ren Contra mitikoa da, argi eta garbi, baina beste joko maitatu bat ere gogora ekartzen du: atzeko planoko tiroketekin Wild Gunsen mekanikak bereganatu dituzte egileek.

Horrela, gure bi dimentsioko planoan dabiltzan etsaien aurka ariko gara, baina hondoan daudenei ere tirokatu beharko diegu, arkade aretoetako hainbat jokoren egitura hartuta. Armen artean ezpatak ere edukiko ditugu, beste sakontasun maila bat gehituta: gaiztoen erasoak desbideratzeko eta itzultzeko aukera daukagu, trebeak bagara; zorionez, bala denborarekin kontraerasoak erraztuko dizkigute.

Ez gara zertan bakarka ibili behar, gainera: binakako kooperatiboa agintzen dute arduradunek arkade aretoetako bizipen horiek berriz bizitzeko. 32 bits-eko kontsolen estetikarekin —Game Boy Advance-ko jokoak gogorarazten ditu—, Neon Infernok xehetasunez betetako pixel art mundua aurkeztuko digu.

Zenovia estudioak Steel Assault ikaragarria kaleratu zuen 2021ean, sekulako balorazioak lortuta. Neon Inferno bigarren proiektu profesionala izango da, generoz pixkat aldatuta, baina estetika zein oinarri berberak mantenduta.

Proposamen oso interesgarria, baina oraindik ez dauka argitaratze datarik: “laster” estreinatzeko asmoa dute PlayStation, Xbox zein Switch kontsoletan nahiz PCan. Probatu nahi baduzu, zorionekoa zu, Steam plataformaren Couch Co-Op Fest jaialdiaren baita demoa argitaratu baitute: otsailaren 17an bukatuko da.