Kanpaina, gidariak, autoak, zirkuituak eta gehiago batuko ditu Bloodborne-n oinarritutako lasterketa jokoak.

Nightmare Kart ikaragarriak The Old Karts eduki gehigarria iragarri du. Debalde gehituko zaio dagoeneko doakoa den lasterketa jokoari.

Denetariko edukiak gaineratuko dizkio jatorrizko tituluari: kanpaina berriarekin batera gidariak eta autoak, zirkuituak, modalitateak, objektuak eta gehiago ikusiko ditugu The Old Kartsen. Soinu banda zoragarriarentzako abesti berriak entzutea ere espero dugu.

Jokoa jarraitzen dutenek ondo jakingo dutenez, Bloodborne maisulanaren girotzea hartzen duen zaleek sortutako jokoa da Nightmare Kart: Bloodborne Kart izenarekin jaio zen proiektua, hain zuzen ere, baina PlayStation-ek FromSoftware-kin batera sortutako jokoari egindako lotura zuzenak ezabatzeko eskatu zion Lilith Walther garatzaileari —egile beraren Bloodborne demake proiektua bertan behera bota zuten atzo bertan, bertsio berri baten zurrumurruak areagotuz—.

The Old Karts espantsioak, konturatuko zineten modura, Bloodbornen The Old Hunters eduki gehigarriari keinu egiten dio. Hori horrela, nahiz eta ehiztarien jokoaren edozein izeni uko egin behar dioten, DLCan agertutako pertsonaiak, piztiak eta kokalekuak modu batera edo bestera lasterketa jokoan txertatzea aurreikusten da.

Iaz estreinatu zen Nightmare Kart PCan: doan aurki dezakegu Steam eta itch.io saltokietan. Mario Kart edo Diddy Kong Racing bezalako arkade lasterketa jokoen ideiak hartuta, edukiz betetako obra bikaina eratu zuen Waltherrek, PS1eko bideojokoen estetika erabilita.

The Old Karts eduki gehigarria “prest dagoenean argitaratuko da”, baina, hori bai, debalde iritsiko zaigu.