Capcom-en saga maitatuaren atal berria 2026an argitaratuko da PS5, Xbox Series zein PC gailuetan.

Onimusha: Way of the Sword beste behin ikusteko aukera eduki dugu State of Play ekitaldian. Bigarren trailerrarekin Miyamoto Musashi protagonista ezagutzera eman dute, baita jokagarritasun irudiak aurkeztu ere.

Toshiro Mifune aktore mitikoaren aurpegia edukiko Musashik —beste behin, 2023ko animean ere gauza bera egin baitzuten— Erdi Aroko Kioton Genma deabruak Oni botereekin akabatzerakoan. Protagonista umoretsua erakutsi digute, eta trebea: dozenaka munstroren aurka arituko gara berarekin.

Horretarako Onimushen ohiko jokagarritasuna berreskuratuko dutela ikus daiteke bideoan. Kontraerasoak eta mugimendu kritikoak ezinbestekoak izango dira garaipena eskuratzeko; oraingoan, baina, kokalekuetako elementuez ere baliatu beharko gara.

Une batean tatami bat lurretik altxatzen ageri da Musashi: babesteko erabiltzeaz gain, jaurtitzeko gai ere izango da. Etsaiak sutzarretara jaurtitzea, kimonoekin begiak estaltzea… edo erasoen desbideratzeekin beste arerioak zauritzea, denetarik egin dezake gure protagonistak.

Katana arruntaz gain, arma bereziren bat edo beste ere ikusi dugu: bi ezpata magikorekin Musashiren ohiko borroka estiloa erabili ahalko dugula dirudi.

Onimusharen itzulera RE Engine garapen motorearekin gauzatuko dute japoniarrek; horrela, atal grafiko ederraz gozatuko dugu.

Pixkat itxaron beharko dugu, zoritxarrez. Onimusha: Way of the Sword 2026an estreinatuko da. PlayStation 5 zein Xbox Series kontsoletan eta PCan jokatu ahalko dugu.

 

Onimusha berpizten

Way of the Sword berriarekin eta 2023ko animearekin Capcomek Onimusharen berpizkundeari ekin dio, baina ez dira ekoizpen bakarrak izango: Onimusha 2: Samurai’s Destiny ikaragarriaren birmasterizazioa prestatzen dabiltzala ezagutu genuen orain egun batzuk.

State of Playean Jubei Yagyu protagonistaren gaurkotutako tituluaren bideo berria eskaini digute, baita kaleratze data iragarri ere: maiatzaren 23an iritsiko da PlayStation, Xbox, Switch eta PC gailuetara.

Hobetutako atal grafikoarekin batera eguneratutako kontrolak eta gehiago agindu dituzte Capcomekoek, lehen Onimusharen birmasterizazioarekin egin bezala.