Aurelien Gateau garatzailearen proiektua Windows, Linux, Mac zein Android gailuetarako prestatuta dago.

Euskaratutako joko txiki zein interesgarria jaso dugu gaur bertan. Pixel Wheels ezagutuko duzu agian: retro estetika zein mekanikak biltzen dituen kode irekiko joko dibertigarri hau gure hizkuntzara lokalizatu du Josu Igoa bideojokozaleak.

Bideojokoak jasotako azken 0.23 eguneraketarekin gehitu da euskara ofizialki hizkuntzen zerrendara; aurretik ere horrela jokatzeko aukera zegoen, baina gaur arte ez da bertsio nagusietan agertu. Igoak urte hasieran itzuli zuen titulua: Aurelien Gateau sortzaileak egindako lana eskertzeko sarrera idatzi zion bere blogean.

Hori horrela, plataforma desberdinetako bertsioek jaso dute aipatutako adabakia. PC-ko bertsioen aldetik, Windows, Linux eta Mac plataformetarako garatu du Pixel Wheels Gateauk: guztiak garatzailearen Itch.io webgunean aurki daitezke. Bertan dago baita Androideko apk fitxategia; dena den, Google-n Play Store saltokitik instalatzeko aukera ere badago.

Lasterketa sinpleak zein zailak dira jokoak proposatutakoak. Micro Machines-en bideojokoen antzeran, ikuspegi zenitalarekin jokatuko dugu: autoak bakarrik egingo du aurrera, eta gure ardura izango da bolantea biratzea. Partidei gatza eta piperra emateko objektuak zein oztopoak aurkituko ditugu: misilak zein minak jaurtitzen ibiliko gara izoztutako guneak saihesten zein turboak erabiltzen gabiltzan bitartean.

Dozenaka auto —desblokeatu beharrekoak barne—, girotze eta musika desberdina daukaten zirkuituak eta kopak eskaintzen ditu bideojokoak. Are gehiago: binaka joka daiteke 90eko hamarkadako partida zoro horiek gogoratzeko —Androideko bertsioak, zoritxarrez, ez dauka aukera hau—. Hala eta guztiz ere, arduradunak jokoa hobetzen eta handitzen jarraitzeko asmoa dauka. 0.23 eguneraketarekin, adibidez, dozenaka berritasun gehitu ditu: horiei buruz hitz egin du sakontasunean jokoaren blogean.

Kode irekikoa dela aipatu dugu lehen: hau Github-en dago ikusgai. Gateauk bere jokoak nahi bezala moldatzeko eta eraldatzeko aukera eskaini dio edonori. Horrez gain, ez dago esan beharrik doako bideojokoa dela.

 

Euskaraz jokatuz zaleen lanari esker

Ez da Josu Igoa zaleak gure mintzairara itzulitako lehen bideojokoak: pasa den urtean Deepnight Games estudioaren Nuclear Blaze interesgarria lokalizatu zuen. Horri buruz ere hitz egin genuen Game Erauntsian.

Nuclear Blaze, Pixel Wheels zein euskaraz dauden gainerako tituluak ezagutzeko, pasa zaitez gure euskaratutako bideojokoen zerrendatik.