PCra eta PlayStation, Xbox zein Nintendo kontsoletara dator skater ezaguna abentura eroekin. Eduki klasikoak zein berriak bilduko ditu.

Tony Hawk’s Pro Skater 3+4 iragarri du azkenik, hainbat zurrumurruren ostean, Activision taldeak. Skaterraren hirugarren eta laugarren jokoen berregitea uztailaren 11n kaleratuko da.

Vicarious Visions estudioak aurreko THPS 1+2rekin egindako antzeko lana hartuko du Iron Galaxy Studios taldeak. Horrela, bi joko mitikoetako kokalekuak, skaterrak, misio orokorrak, eta, nola ez, soinu bandak errepikatuko dute.

Aireportua, Los Angeles, College… toki maitatuak itzuliko dira, betiko moduan dozenaka trikimailu eta misio betetzeko. Eduki berriak ere agintzen dituzte: gaur egungo skaterrak eta abesti berriak gehituko dituzte, baina, lasai, Ace of Spades entzuten jarraituko dugu-eta.

Berrikuntzarik esanguratsuena atal teknikoarena da: grafikoki osorik berregin dituzte bi jokoak, 2000. hamarkadako tituluei aurkezpen modernoa eskaintzeko.

THPS 4ri dagokionez, tamalez, ez dirudi jokoaren formatua errespetatuko dutenik. Formula orokorretik pixkat aldendu ziren laugarrenaren kanpainarekin, 2 minutuko saio motz baina zirraragarriak modelo askeagatik ordezkatzeko. Egileek ez dute guztiz baieztatu; beraz, itxaron egin beharko dugu.

Sareko multijokalari berrituarekin dator, behintzat: beste zazpi lagunekin aritu ahalko gara, eta, gainera, joko gurutzatua (crossplay) agintzen dute egileek bertsio desberdinen artean. Bukatzeko, gure mailak sortzeko aukera egongo da berriro Create-A-Park editoreari esker.

Digital Deluxe edizio berezia ere aurreratu digute Activisionetik: besteak beste, Doomslayer-arekin jokatzeko aukera eskainiko digu.

Ordenagailuetan eta PlayStation, Xbox zein Nintendo kontsoletan merkaturatuko da Tony Hawk’s Pro Skater 3+4, esan bezala, uztailaren 11n.