Deluxe zein Worldparty bertsioak doan eta euskaratuta jaitsi daitezke ordenagailuetan. Komunitateak sortutako abestiak erabiltzeko aukera eskaintzen dute.

Game Erauntsian euskarazko bideojokoen zerrenda osatzen jarraitzen dugu. Asko eta asko izan dira aurten gehitu ditugun titulu berriak; hala eta guztiz ere, behin baino gehiagotan aipatu dugun modura, zenbaitetan gure hizkuntzara lokalizatutako tituluak ezagutu gabe geratu izan gara. Hori izan da UltraStar bideojokoen kasua: SingStar ezagunetan oinarritutako kode irekiko lanok euskaraz joka daitezke.

Aski ezagunak diren bideojokoon egitura berbera proposatzen dute UltraStar Deluxe nahiz UltraStar Worldparty tituluek. Argi esanda, bideojokoetan bilakatutako karaokeak dira. Mikrofonoa hartuta bakarka edo lagunekin abestuko dugu, markarik onenen bila.

Hori esanda, UltraStarren mekanikek ez daukate inolako misteriorik: bideojokoek gure tonua hartuko dute abestiarenarekin alderatzeko, eta horren arabera kalifikatuko gaituzte. Edozein motatako mikrofonoa erabil daiteke bideojokoan aritzeko.

Komunitateak garatutako kode irekiko bideojokoak izanda, baina, berezitasun benetan interesgarriak dituzte bi jokoek. PlayStationen SingStarrek abesti kopuru mugatua eskaintzen dute; alabaina, ez da gauza bera gertatzen UltraStarrekin.

Komunitateak edozein abesti hartuta titulu hauetarako bertsioak eratzeko aukera dauka. Hori horrela, sarean zehar askotariko kantak eta bertsioak aurkituko ditugu, guztiz doan: arduradunek 10.000 abesti baino gehiago daudela azpimarratzen dute beren webgunean. Horien artean euskal kantuak ere aurki daitezke, gainera: Mikel Laboaren, Hertzainaken edo Ken Zazpiren abestiak ikusi ditugu, besteak beste.

Horiek sortzeko tresnak ere inplementatu dituzte garatzaileek, gainera: modu horretara, nahi izanez gero jokorako gure abestiak presta ditzakegu. Bideoklipak erabiltzea, era guztietako informazioa txertatzea nahiz urrezko notak inplementatzea ahalbidetzen du editoreak, beste hainbat ezaugarriren artean.

Goazen Deluxe eta Worldparty bertsioen arteko desberdintasunez hitz egitera. UltraStar Deluxe da jatorrizko bideojokoa: 2007an jaso zuen lehen bertsioa, eta 2020an bere azken eguneraketa. Windows, GNU/Linux eta MacOS sistema eragileetan erabil daiteke. Hala ere, aurretik garatutako UltraStarren eguneratzea da Deluxe.

Oinarrizko interfazea daukan arren, hau pluginen eta gaien bidez itxuraldatzea posible da. Estatistikak, hamabi jokalarirentzako party modalitatea, kamerentzako euskarria eta askoz ezaugarri gehiago biltzen ditu Deluxek.

Jatorrizkoa hau izan arren, zaleen beste talde batek Worldparty bertsioa sortzen dihardu. Oinarriak berberak dira, Deluxen kodea erabiltzen baitu; dena den, interfaze modernoagoa eta beste zenbait aukera eskaintzen ditu.

Esan bezala, biak aurkitzen dira euskaratuta: ezin izan dugu itzulpenaren arduraduna ezagutu, baina asko eskertuko genuke horri buruzko informazioa jasotzea!

Bukatzeko, UltraStar Play ere aipatu beharra dago: Kickstarter kanpaina abiatu berri duen proiektua da. Beta bertsioa jaitsi daitekeen arren, ez dugu euskaraz aurkituko, zoritxarrez. UltraStarren eguneratutako bertsioa izango litzateke Play, ordenagailuetarako nahiz gailu mugikorretarako eta telebistatarako euskarriarekin.

 

Musika eta euskara

Modu batean, UltraStarrek orain gutxi Game Erauntsiak euskaratu duen beste bideojoko batekin antzekotasun handiak ditu: Clone Hero zaleen komunitateak sortutako Guitar Hero frankiziaren klona da.

Jokalariek sortutako abestiak erabiltzeko aukera eskaintzen du, UltraStarren modura; horrez gain, periferiko sorta zabalarekin joka daiteke. Gitarra, baxua zein bateria jotzeko aukera eskaintzen du.

Zer esango dugu: gabonetan familiarekin eta lagunekin batzeko festa bideojoko aproposak dira Clone Hero eta UltraStar. Hauek zein euskarazko gainerako tituluak ezagutzeko Game Erauntsiaren zerrendatik pasa zaitezke!