Ibai Oihangurenen azken itzulpena 2020ko titulu maitatuarena da: PCko bertsioa euskara dezakegu.

Euskaratutako bideojoko berriarekin hasi dugu 2025. urtea. Azken urteotan klasikoan bilakatu den obrarekin, gainera: Untitled Goose Game ezagunean gure hizkuntzan joka dezakegu jadanik.

Ibai Oihangurenen lokalizazio lanari esker gozatuko dugu euskaraz House House etxearen jokoan. Ohi bezala, baina, tamalez, PCko bertsioa soilik itzul daiteke; zorionez, itzulpena azkar eta erraz inplementatzeko bideak prestatu ditu Oihangurenek.

Windows sistema eragilerako instalatzaile erabilerraza daukagu, hasteko. GNU/Linux distroetako erabiltzaileek, bestalde, script sinple batekin lortuko dute euskaratzea; ez hori bakarrik, Steam Deck gailurako ere balioko digu kode berberak. Fitxategi guztiak ibaios.eus webgunean eskaini ditu bideojokozaleak.

Antzara bat, bizilagun arruntez jositako herria eta hauek uxatzeko karranka zaratatsua. Ez dugu besterik behar: antzara adarjolean bilakatzea proposatzen digu Untitled Goose Gamek.

Maila desberdinetan hainbat helburu proposatuko zaizkigu. Horiek betetzeko bidea aurkitzea gure esku egongo da, sandbox erako jokagarritasun askea baita jokoaren ardatza. Karranka eginez herritarren arreta erakarriko dugu, hauek gogaituz… baina gure benetako xedea lortu ahal izateko bidea izango da: giltzak, kapelak eta bestelakoak lapurtzea, orokorrean.

2020an estreinatutako bideojokoak balorazio benetan positiboak eskuratu zituen bai prentsaren, bai jokalarien aldetik. Dibertsioa eta eromena nagusi dira House Housen tituluan, baina beti estetika eta girotze atseginak mantenduz.

Onena —euskaraz jokatzeaz gain—? Joko osoan lagun batekin ari gaitezkeela: kooperatiboarekin bi antzarek kaosa eragingo dute herritar gizajoen artean.

Euskaratu daitekeen PCko bertsioa Steam, itch.io zein Epic Games Store saltokietan eros daiteke. Itzulpena modu berean aplikatuko dugu bakoitzarekin.

Esan bezala, 2025a indartsu hasi dugu, eta horrela jarraitzea da asmoa. Euskarazko bideojoko gehiago ezagutuko ditugu laster: guztiak Game Erauntsiaren euskarazko bideojokoen zerrendan aurkituko dituzu!