Wonder Woman superheroiaren bideojokoa bertan behera geratu da. Enpresaren “norabidean aldaketa estrategikoa” burutzeko erabakia dela diote.

Warner Bros. Games azpitaldeak hainbat estudioren itxiera ezagutzera eman du. Monolith Productions, Player First Games zein Warner Bros San Diego desegin ditu.

Ohiko adierazpenak eskaini dituzte Warnerretik: “estudioak berregituratu” behar dituztela adierazi dute, batez ere, “frankizia gakoen inguruan: Harry Potter, Mortal Kombat, DC eta Game of Thrones” aipatuz. Hartutako erabakia enpresaren “norabidean aldaketa estrategikoa” dela azpimarratuta, ez da, jabeen arabera, “estudioen gaitasunen isla”.

Kolperik gogorrena Monolithena da, zalantzarik gabe. 1994. urtean eratutako estudioak Blood, No One Lives Forever, Alien vs. Predator 2, F.E.A.R, Condemned: Criminal Origins edo Middle-earth: Shadow of Mordor zein War bikainak argitaratu ditu, besteak beste.

Orain arte garatzen zebilen proiektua deuseztatu dute, gainera, Warnerrekoek: 2021ean iragarritako Wonder Woman superheroiaren abentura titulua ikusi gabe geratuko gara. Harritzekoa, DC argitaletxeko heroiak euren frankizia handien artean kokatzen dituztela ezagututa.

Player First Games, bestalde, Multiversus kaleratzeaz arduratu zen taldea da. Porrota izan da Warnerrentzat, birritan itxita; hala ere, 2019an osatutako estudioa iaz erosi zutela azpimarratzekoa da.

Bukatzeko, WB San Diego iragarri gabeko lehen bideojokoa prestatzen ari zen.

Ez dakigu zenbat langile kaleratuko dituzten guztira: enpresaren jabeek erabakia publiko egin dute ordu batzuk lehenago Bloomberg edo Polygon aldizkariek berria zabaldu ondoren.

JB Perrette WB Gameseko arduradun nagusiak “azken argitalpenen kalitatea” nabarmentzen du langileei bidalitako mezuan: “Ez dugu asmatu”.

Suicide Squad: Kill the Justice League, Gotham Knights, Multiversus bera, azken LEGO jokoak, Quidditch Champions, Mortal Kombat 11… hainbat proiektu kaleratu dituzte azken urteotan. Horietatik, arrakasta esanguratsua lortu duen bakarra Hogwarts Legacy izango litzateke.

Etorkizunera begira, aipatutako frankizietan ardaztuta “proiektu handiagoak” garatu gura dituzte, gailu mugikorretako irabaziak areagotuz, “sinesgarritasuna eta harrotasuna berreskuratzeko”.