PlayStation 5 eta Nintendo Switch kontsoletarako prestatu dute. Ordenagailuetan zein Xboxen digitalki eros daiteke.

Irungo Keplerians estudioak Evil Nun: The Broken Mask fisikoki kaleratu du. Meridiem Games eta Feardemic argitaletxeekin elkartu dira beldurrezko abenturaren Unholy Edition izeneko edizio berezia prestatzeko.

PlayStation 5 eta Switch kontsoletarako eros dezakegu jokoa fisikoan. Diskoa edo kartutxoa ekartzeaz gain, hainbat berezitasun bildu dituzte: arte liburu fisikoa, txartel bereziak nahiz soinu banda digitala deskargatzeko kodea eskuratuko dituzte erosleek.

Evil Nun: The Broken Masken jatorrizko bertsio digitala PCan eta PlayStation zein Xbox kontsoletan estreinatu zen 2023ko abenduan. Aurretik, sarbide goiztiarrean eros zitekeen ordenagailuetarako; ostean, 2024ko otsailean, Switch hibridorako port-a prestatu zuten irundarrek.

2018an gailu mugikorretan estreinatutako Evil Nun originalaren berregitea da. Moja ero batengandik ihes egitea proposatzen digu beldurrezko jokoak; horretarako, maila desberdinetan sakabanatutako objektuak bildu beharko ditugu ezkutuan gabiltzan bitartean.

 

“600 milioi deskarga baino gehiago”

Azaro hasieran Game Erauntsiatik Azkue Fundazioarekin elkarlanean antolatutako Jokoteknia Bideojokoen VII. Euskal Jardunaldian parte hartu zuen Mikel Antero Keplerians estudioko artista nagusiak.

Evil Nun zein Irunen sortutako Ice Scream edo Mr. Meat beldurrezko bideojokoen sorkuntza prozesuari buruz hitz egin zuen; gainera, une honetan prestatzen dabiltzan Glitchmare itxurosoa aurkeztu zuen Anterok.

Euskal Herriko bideojoko talderik arrakastatsuenetakoa da Keplerians: euren jokoek 600 milioi deskarga baino gehiago biltzen dituzte Android eta iOS sistema eragileetako Play Store eta App Store saltoki digitaletan.

Evil Nun: The Broken Mask remake-arekin bideojoko plataforma nagusietara igaro dira lehen aldiz.