Team Cherry-koen tituluak zaleen miresmena lortu du, azken urteetako indie lanik sarituenetakoa izatera iristeraino. Ordenagailuetan joka daiteke gure mintzairan.

Garatzaile independenteek maisulan ugari eskaini dizkigute azken urteetan. Enpresa handien AAA tituluengandik urrundu, eta beste ezaugarri batzuk dituzten obrak bideojokozaleak maitemintzea lortu dute. Maila bikaineko joko sorta anitza edukita, zaila da bakar bat nabarmentzea; hala eta guztiz ere, azken urteetan Hollow Knight izan da indie lanen artean begirada gehien erakarri dituena. Orain, are gehiago lortuko ditu, Game Erauntsiaren komunitateak ondo ezagutzen duen Ibai Oihanguren bideojokozaleak guztiz euskaratu baitu.

Gure Telegram taldea edota egiten ditugun ekintzak jarraitzen badituzu, albistea ezagutuko zenuen; izan ere, joan den urte bukaeran itzulpenaren lehen bertsioa kaleratu zuen Oihangurenek. Dena den, euskaratutako bideojokoen zerrendara gehitu gabe uztea erabaki zuen, eduki gehigarrietako testuak gehitzea eta zuzenketa batzuk egitea falta zitzaiola argudiatuta.

Orain bai, ordea: lokalizazio lana bukatuta, Team Cherry estudio australiarraren lehen bideojokoa oso-osorik goza daiteke euskaraz. Lur-Aho herrixkatik hasita, Sakrabiako erresuma esploratzeari ekin diezaiokegu gure hizkuntzan ezkutatzen dituen sekretuak eta misterioak argitzeko.

 

Bihur zaitez zaldun… txikian

“Izaki gorenok, hitz hauek zuontzat baino ez dira”. Itxura mengela duen zomorro zaldunaren rola hartuko dugu Hollow Knighten. Sakrabiara bere jatorriaren berri izateko hurbildu da, baina hondatutako erresuma baino ez du aurkituko bertan. Hondatutakoa, eta etsaiz betetakoa: antzinako bizilagunak eta animaliak gupidagabeko piztietan bilakatu dira gaitz misteriotsu baten ondorioz, eta horren sekretua argitu beharko dugu.

Bi dimentsioko metroidvania abentura da Team Cherryrena: generoko lanak ezagutzen badituzue, badakizue zer aurkituko duzuen. Zeharkatzeko mapa erraldoia eskaintzen du tituluak; ziurrenik, hasiera batean aurreikusiko duzuena baino askoz zabalagoa. Aurrera egiteko bide desberdinak aurkituko ditugu, baina oztopoak saihesteko eta bidetik jarraitzeko ezinbestekoa izango da abileziak biltzea: jauzi bikoitza, hormetatik zehar igotzea edo eraso bereziak jasoko ditu, besteak beste, zaldun txikiak.

Modu horretara, Sakrabiako kokaleku anitzetara iritsiko gara. Bakoitzak girotze propioa dauka: arlo horretan ikaragarrizko lana egin dute garatzaileek. Galduta ibiliko garen arren, gozamen hutsa da zoko guztietatik sekretuen bila aritzea.

Etsai sorta ikaragarriarekin topo egingo dugu; denetariko piztien gainetik egongo dira, baina, buruzagiak. Hauek garaitzea ez da batere erraza izango, eta iaiotasun maila handia eskatuko dute. Prozesua errazteko, baina, askotariko indartzaileak lortuko ditugu abenturan: kutun desberdinak ekipatuta abilezia bereziak desblokeatuko ditugu, adibidez. Horiei esker borrokatzeko modua erabat alda dezakegu: eztenarekin jotzen ibiltzea da aukeretako bat, baina arima bidezko botereekin ere ikaragarrizko ahalmenak edukiko ditugu.

 

Misterioz betetako erresuma

Arestian aipatu modura, sekretuak argitzea izango da gure eginbehar nagusietakoa. Horretarako, ezagutuko ditugun pertsonaiekin hitz egitea ezinbestekoa izango da: oraindik sena galdu ez duten horiek laguntza eskainiko digute, baita munduaren inguruko argibideak eman ere.

Oihangurenek egindako itzulpenarekin, hauen hitzok euskaraz irakurriko ditugu orain. Hollow Knightek hiztegi aberatsa eta anitza edukita, ez da lan erraza izan testu guztiak lokalizatzea; zorionez, bideojokozale euskaldunak egindako itzulpen lana ikaragarria dela esan dezakegu.

Gainera, eduki gehigarri guztiak ere itzulita aurki ditzakegu: Amets Ezkutuak, Grimmen Konpainia, Bizi-odola eta Jainkoen Maisua izeneko espantsioek era guztietako berritasunak gehitzen dizkiote jokoari, eta guztiz doakoak dira.

Euskaraz jokatzeko jarraitu beharreko pausoak benetan errazak dira; ohi bezala, itzulpena ia automatikoki ezartzeko instalatzailea prestatu du Oihangurenek. Hau bere webgunean aurki dezakegu: instalatzailea jaitsita, eta bideojokoa instalatuta, bertan agertuko zaizkigun pausoak jarraitu beharko ditugu.

Zoritxarrez, PC-an soilik joka dezakegu euskaraz Hollow Knighten. Hori bai, Windows zein Linux/GNU sistema eragileentzako balio du itzulpenak; azken horren kasuan, script bidez instalatu beharko dugu, baina ez dauka misterio handirik. Steam Deck-ean jokoa euskaratzeko aukera ere badago! Silksong desiratuaren zain gaudela lehenengo jokora berriz aritzeko aitzakia aparta, zalantzarik gabe.

2019an argitaratu genuen analisian Hollow Knight “metroidvania guztien errege” izendatu genuen. Agerikoa da asko gustatzen zaigun jokoa dela, baina hauxe genion Team Cherryren lanari buruz:

Abenturazaleentzako altxorra da Hollow Knight. Azpigeneroko obra esanguratsuenen parean, edo are gorago dago: bere maisuengatik ikasi eta azken urteetan sortu den Metroidvania ikusgarrienetakoa da. Ez hori bakarrik, gainerako AAA jokoen parera heltzea lortu du, benetan joko liluragarria baita.

Obra ikaragarri honekin eguneratu dugu lehenengoz euskarazko bideojokoen zerrenda 2023an. Datozen hilabeteotan are titulu gehiago gaineratzea aurreikusten dugu, adi ibili zaitez beraz!