Aiguanachein garatzaileak bakarka sortutako plataforma jokoa da: 2020an kaleratu zuen Itch.io saltokian.

Euskarazko bideojoko guztiak biltzen saiatzen gara Game Erauntsiaren zerrendan. Noizean behin, tamalez, baten batek ihes egiten digu; zorionez, euskal komunitateak guregana jotzen du hauen berri emateko. Horixe da Powa! retro plataforma joko modernoaren kasua: Natalia Martin zaleak euskaratu du Game Boy eta Game Boy Color kontsola eramangarrietako abentura.

Aiguanachein garatzaileak Nintendo-ren kontsola zaharretako jokoak eratzeko ZGB garapen motorea erabilita sortutako proiektua da Powa! Game Boyko Kirby’s Dreamland edo Trip World bezalako klasikoak inspirazio iturritzat hartzen dituela aldarrikatzen du sortzaileak.

Powa izeneko izakitxoa kontrolatuko dugu: bere jaioterriko gaitza osatzeko beharrezkoa duen sendabelarra aurkitu du abentura luze baten ostean, eta etxerako bidean lagunduko diogu.

Lau mundu —eta gehiago— zeharkatu eta garaitu beharko ditu Powak lorearen bila. Jauzika ariko gara gehienbat, baina arerioak burbuila erasoarekin garaitzen eta erronkak gainditzen ere ibiliko da izakitxoa. Mundu bakoitzaren amaieran, izan behar den moduan, buruzagi arriskutsuei aurre egin beharko diegu.

2020an kaleratu zen arren, GB eta GBC kontsoletarako jokoa izanik atal tekniko retroa aurkezten digu bideojokoak. 8 bit-eko grafikoak ikusiko eta nostalgiaz betetako soinu banda entzungo ditugu Powan: Sergeoo musikagilea arduratu da jokoaren doinuak sortzeaz. Sarreratzat funtzionatzen duen komiki digitala ere badauka: hori zein kaxako iruditegia Ivan Miguel marrazkigilearenak dira.

Euskaratzea otsailean inplementatu zuten ofizialki Aiguanacheinek eta Martinek. Jokoa zein itzulpena garatzailearen Itch.io webgunean aurkituko ditugu: titulua 3,50 dolarreko prezioan dago salgai. Erosi aurretik doako demoan joka dezakegu.

ROM fitxategia izanik kontsola originaletan kargatzeko bideak beharko ditugu —Super Game Boy bidez ere goza daiteke, marko berezi eta guzti—; bestela, emulatzaileak erabilita ere joka dezakegu retro jokoan.

Bertsio digitalaz gain, First Press Games argitaletxeak merkaturatutako edizio fisiko desberdinak ere daude. Zoritxarrez, hauetan ez dugu euskaratutako jokoa aurkituko.

 

Retro jokoak, euskaraz

Game Erauntsiaren euskarazko bideojokoen zerrendan gehitzen den Game Boyko bigarren jokoa da Powa! Lehena orain egun gutxi batzuk gaineratutako Ciao Nonna izan zen, kasualitatez. Aurretik, Game Boy Advance 32 bit-eko eramangarrirako Metroid Zero Mission bikaina zegoen.

Horiez gain, NES, SNES, Nintendo 64 edo PlayStation kontsoletako jokoak ere euskaratu dituzte euskal bideojokozaleek: Super Mario Bros. eta World, Re-Volt edo Super Mario 64 aurkituko ditugu zerrendan, besteak beste.