‘Devil May Quake’ tiro jokoak atal grafikoa txukundu eta hobekuntza teknikoak gehitu ditu. Infernuaren zortzigarren geruza prestatzen ari dira orain.

Ultrakill zoragarriaren aurretiazko sarbideak aurrera dihardu. Ultra_Revamp izeneko eguneratzearekin denetariko edukiak gaineratu dizkiote tiro jokoari.

Arsi “Hakita” Patala garatzaileak aditzera eman duenez, ultragaurkotzearekin Ultrakillen atal grafikoa zein teknikoa hobetzen fokuratu da. Urtebeteko epean prestatutako berritasunekin jokoa edertzen aritu dela esan daiteke.

Infernuko geruza guztiak eraberrituta ikusiko ditugu, horrela: aldaketan nabarmenagoak dira maila batzuetan, baina orain arteko guztiak txukundu ditu. Argiztapena, efektuak, modeloak… askotarikoak dira aldaketak; gainera, errendimendua ere hobetu duela azaldu du egileak. Maila bakoitzean fps-ak areagotu dira —lasai, jokoak ez baitu askorik eskatzen—.

Aldaketak azpimarratzeko bideo txikia prestatu du Hakitak:

Are eduki gehiago dakartza ultraeguneratzeak. Errepikapen edo encore mailak aurkeztu ditu sortzaileak: bi aurkituko ditugu oraingoz. Dioenez, ez dira errepikatze hutsak izango, ordea: maila askoz zailagoak jokatuko ditugu, eta, itxura batean behintzat, ez dute originalekiko antz handirik edukiko.

Egungo maila guztiak gainditu ostean desblokeatuko ditugu ultramailok; halere, errepikapen maila gehiago inplementatuko dituzte Ultrakill kaleratu ondoren.

 

Helmuga, geroz eta hurbilago

Ibilbide orria markatzeko aprobetxatu du Hakitak. Aurkezpena atonduta, orain infernuaren zortzigarren geruzako mailak bukatzea da taldearen helburu nagusia; hori eginda, “amaiera handia” garatzen hasiko dira, 1.0 bertsioa, alegia; behin jokoa ofizialki merkaturatuta daukatenean, errepikapen mailak datoz… eta, azkenik, zerbait gehiago egon daitekeela aurreratu dute.

“Azkena bistan dago”, diote. 2020. urtean ekin zioten Ultrakillen early access faseari: ordutik hona hainbat gaurkotze jaso ditu tiroz eta odolez betetako retro tiro jokoak: mailak, armak, erronkak eta etsaiak zein buruzagiak gaineratu dizkiote, beste hainbaten artean.

Duela urte pare bat hitz egin genuen aurretiazko sarbideari buruz Game Erauntsian —eta, aurretik, demoa izan genuen hizpide—. Aurrerapenean “ikaragarrizko maila erakutsi duela” aipatzen genizuen, akzioa maite dutenentzako aproposa:

Retro tiro jokoen muina nahiz mamia hartu, eta aldi berean berritasun interesgarriak gehitzen dizkio azken urteetako FPS frenetikoena eta xarmagarriena izateko. Duelu bortitzak baina gozagarriak biziko ditugu, beti bidezkoak, eta mekanikak ulertu ahala infernua menderatzea lortuko dugu.

Ultrakillen sarbide goiztiarra PCrako eros dezakegu.