Grimorio of Games garatzaile katalanaren jokoaz PC, PS5, PS4, Xbox Series, One eta Switch plataformetan goza daiteke.

Urte hasieran kaleratutako Sword of the Necromancer interesgarriak 2.1b eguneraketa garrantzitsua jaso berri du ordenagailuetan zein kontsoletan. Garrantzitsua, euskarazko itzulpen ofiziala gehitzen duelako: Game Erauntsia Elkarteak egindako euskaratzea, hain zuzen ere.

Modu horretara, euskara katalanari eta galegoari gehitzen zaie Grimorio of Games estudio katalanak prestatutako akziozko RPG honetan. The Legend of Zelda klasikoak gogora ekartzen ditu Sword of the Necromancerrek, baina azken urteetan horren ezagunak egin diren roguelike mekanikak gaineratuta.

Abentura honetan Tama gaztearen bidaia biziko dute jokalariek. Koko laguna eskoltatzeko lanak betetzen zituela, bizia galtzen du honek; berpizteko edozer egiteko prest dago Tama. Horretarako nekromantearen ezpata arriskutsua erabili beharko du: hainbat ziega esploratu eta gainditu beharko dituzte jokalariek, ezpata erabilita etsaiak berpiztu eta hauen botereak erabiltzen dituzten bitartean.

Mailaz igo, ekipamendua hobeto eta armada txikia eratzea izango da xedea, horiek erabilita zaindariak garaitu ahal izateko.

Hori horrela, aipatutako Zelda sagako jostagarritasuna Enter the Gungeon bezalako bi dimentsiotako rogueliken zein Azure Dreams JRPG-en elementuekin nahasten du Grimorio Gamesen abenturak. Izan ere, partida galtzerakoan lortutako armak eta munstroak galduko dira, baina partidan eskuratutako mailaren erdia gordeko da. Partida bakoitzean ahalik eta urrunen iristea izango da beraz erronka.

 

Itzulpen prozesu luzea

Uda aurretik hasi zuen Game Erauntsia Elkarteak Sword of the Necromancer euskaratzeko lana. Garatzaileei itzulpena proposatzerakoan hauek pozik onartu zuten; esan bezala, katalanez eta galegoz ere argitaratu zuten bideo-jokoa hasiera batetik, hizkuntza gutxituentzako begirunea erakutsita.

Testu aldetik, 1.800 hari inguruz osatutako bideo-jokoa da; orain arte elkarteak parte hartu duen itzulpen proiekturik handienetakoa izan da hortaz. Neketsua eta luzea izan arren, indie bikaina euskaratzeko lan aparta egin dute Game Erauntsiako kideek. Garatzaileak harro agertu dira euskara beren jokoan gehitu ahal izan dutelako Steameko blogean idatzitako oharrean.

2020. urtean Kickstarter bidez lortu zuten bideo-jokoa garatu ahal izateko beharrezko laguntza ekonomikoa garatzaile katalanek. Hasiera batean eskatutakoa soberan gainditu zuten: bilatzen zuten zenbatekoa % 1300ean gainditzea lortu zuten

Sword of the Necromancer euskaraz joka daiteke bai PCan, bai kontsoletanPlayStation 5, PlayStation 4Xbox Series, Xbox One eta Nintendo Switch gailuetan kaleratu dute ARPGa Grimorio of Gamesekoek. Ordenagailuen kasuan, Steam plataforman eskuratu daiteke.

 

Euskarazko bideo-jokoen zerrenda hazten doa

Sword of the Necromancer gero eta handiagoa den euskarazko bideo-jokoen zerrendara gehitzen da modu horretara. Azken asteetan bideo-joko mordoa gaineratzeko aukera izan du Game Erauntsia Elkarteak: esate baterako, Among Us ezaguna itzultzeaz arduratu da.

Horrez gain, garatzaileek zein euskal bideojokozaleen komunitateko kideek egindako itzulpenak ikusi izan dira egunotan: Everhood, Oddworld: New 'N' Tasty, Space RevengeMagic TwinsNuclear BlazeSuper Woden GPThe Five CovensHyper Light Drifter, Inside edota Pile Up! Box by Box bikainak ikusi ditugu gure hizkuntzan.

Aipatutakoak eta askoz gehiago bildu ditu elkarteak webgunean daukan euskarazko bideo-jokoen zerrendan.