Windows-en zein GNU/Linux-en argitaratu da lokalizazio proiektua. Survival Horror titulu klasikoen mekanikak berreskuratzen ditu rose-engine garatzailearen jokoak.

Ahaztutako promesak, ziborgak, sekretu beldurgarriak eta puzzleak batzen dituen Signalis bikaina euskaraz joka daiteke dagoeneko. Ibai Oihanguren bideojokozaleak gauzatutako azken itzulpen lana da: iaz argitaratutako indie titulua euskaratu eta lokalizazioa erabiltzeko beharrezko tresnak argitaratu ditu.

Oihangurenen gainerako itzulpenekin gertatzen den modura, ibaios.eus webgunean eskaintzen ditu mod-aren fitxategiak. Windows nahiz GNU/Linux sistema eragileetan erabil daiteke: bakoitzean instalatzeko jarraitu beharreko pausoak ere azaldu ditu jokoaren orrialdean. Egia esan, ez dauka inolako misteriorik: itzulpena txertatzeko instalatzailea eta guzti prestatu du.

Lokalizazio lanaren oztoporik handiena Signalisen hiztegian egon dela aipatu du modaren arduradunak: “Batez ere oso testu teknikoak dauzkalako izan da erronka: armak, teknologia, etab.”. Hori esanda, terminologia berezia proiektuaren arlo “interesgarria” dela uste du Oihangurenek.

 

Beldurraren erroetara itzuliz

Gizadiak espaziora jo duen etorkizunean girotzen da Signalis. Replika deitutako ziborgak gizonen eta emakumeen artean bizi dira: Elster izeneko androidaren rola beteko dugu abenturan. Galdutako planeta izoztuan esnatuko da, amesgaizto batean, baina bere adiskidearen bila abiatu beharko da.

Hiru dimentsioko grafiko pixelatuak anime estetikarekin uztartzen ditu rose-engine sortzailearen lanak: bi garatzaile alemanek osatutako taldea da. Ikuspegi isometrikoan esploratuko ditugu gune anitzak; tiroketetan ere halaxe ibiliko gara, laser erakusledun armekin apuntatuz.

Balak urriak izango dira, ordea: hori dela eta, tiro egitea hautua izango da. Noiz komeni da munizioa xahutzea? Antzekoa gertatzen da inbentarioarekin, mugatua izango baita, bai armentzat, bai aurrera egiteko beharrezko objektuentzat.

Izan ere, hainbat gunetatik zehar hedatuko diren puzzleak gainditzen ibiliko gara. Gure adimena erabiltzea beharrezkoa izango da, baina baita item preziatuak eskuratzea ere. Hori horrela, Resident Evil bezalako beldurrezko obra klasikoak gogora ekartzen ditu Signalisek.

Indargune nagusia, baina, bere istorioan datza: misterioz betetako gidoia jarraituko dugu rose-enginen jokoan. Behin eta berriro deja vu antzeko sentipenak eragingo dizkigu, eta jazotako guztiaz ohartzeko abentura zenbait aldiz gainditu beharko dugu.

Beldurrezko jokoen zaleek ziurrenik ezagutuko duten joko horietakoa den arren, Signalis abentura independente ezezagun horietakoa da, tamalez.

Hala eta guztiz ere, hainbat sari jaso ditu 2022an estreinatu zenetik: besteak beste, aurtengo New York Game Awars sarietan ezkutatutako altxorrik onenaren medaila eraman du. Hedabide desberdinen 2022ko jokorik onenen zerrendetan ere agertu izan da, gainera.

 

Zerrenda luzeko azkena

Game Erauntsiaren komunitateko kideek ondo ezagutzen duten izena da Ibai Oihangurenena. Ziurrenik bideojoko gehien euskaratu dituen zalea da: berenak dira, besteak beste, Hollow Knight, Hyper Light Drifter, Inside, Return of the Obra Dinn, Owlboy zein Kopanito bikainen itzulpenak.

Ibaios.eus webgunean aurki ditzakegu guztiak euskaratzeko fitxategiak; horrez gain, beti bezala Game Erauntsiaren euskarazko bideojokoen zerrenda bidez ere bila daitezke.

Euskaratzeko fitxategi berezirik behar ez duen bideojokoa ere itzuli du Oihangurenek, gainera: gure mintzairan ofizialki joka daitekeen Papers, Please zoragarria lokalizatzeaz arduratu zen.